Беларусьтің авторитар билеушісі Александр Лукашенко түрлі қылмыстар бойынша, соның ішінде "экстремистік әрекеттер" үшін де, сотталған 16 адамға рақымшылық жариялау туралы шешімді бекітті. Бұл шешім Тәуелсіздік күні қарсаңында қабылданды.
Рақымшылық жарияланғандар арасында сегіз әйел мен сегіз ер адам бар. Олардың үшеуінің жасы 50-ден асқан, екеуі – созылмалы дертке шалдыққан, біреуі – мүгедек. Тоғыз сотталушының кәмелетке толмаған балалары бар.
Бұған дейін рақымшылық және қылмыстық жауапкершіліктен босату мәселелері жөніндегі комиссияның төрайымы Ольга Чуприс 2025 жылдың алғашқы бес айында Александр Лукашенко рақымшылық туралы берілген өтініштердің 50 пайызын қанағаттандырды деп мәлімдеген. Алайда бұл мәліметті тексеру мүмкін емес, деп жазды Азаттықтың Беларусь қызметі.
Адам құқықтарын қорғайтын "Вясна" орталығының 2 шілдедегі дерегіне сәйкес, Беларусь Республикасында 1164 саяси тұтқын бар.
Бұған дейін құқық қорғаушылар 2024 жылдан бері елде 300 саяси тұтқын рақымшылыққа ілінгенін хабарлаған.
ОҚИ ОТЫРЫҢЫЗ БҰҰ: Беларусьте 2020 жылдан бері ондаған билік сыншысын күштеп психиатрия емханасына жатқызған